Dünya üzrə aparılan araşdırma sübut edib ki, artıq çəki və həddən artıq kökəlmək xərçəng xəstəliyi risqi yaradır.

Axar.az xarici mediaya istinadən xəbər verir ki, statistikaya görə, hazırda ABŞ əhalisinin üçdə biri piylənmədən əziyyət çəkir. Böyük Britaniyada da oxşar vəziyyətdir. Burada da hər beş ölkə vətəndaşının artıq çəkisi var. Bunu nəzərə alan amerikalı mütəxəssislər onkoloji xəstəliklərlə artıq çəkinin əlaqəsini yoxlamaq qərarına gəliblər.

Alimlər tədqiqatlara beş milyon könüllü cəlb edib. Araşdırmalar göstərib ki, təkcə Birləşmiş Krallıqda hər il artıq çəkidən əziyyət çəkən insanlarda 12 mindən çox onkoloji xəstəlik halı qeydə alınır. Müəyyən edilib ki, qadınlarda bədən kütləsi indeksinin yüksəlməsi onların 62 faizində uşaqlıq xərçənginin inkişafı riskini artırır. Həmçinin bədən kütləsi indeksinin normadan 25 faiz artımı hər iki cinsdə böyrək xərçəngi yaradır.

Artıq çəki kişilərin 10 faizində bağırsaq xərçənginə, qadınların isə 41 faizində süd vəzi xərçənginə tutulmaq ehtimalını artırır. Ekspertlərin fikrincə, piylənmə estrogen hormonunun artmasına şərait yaradır ki, bu da döş xərçənginin inkişafına gətirib çıxara bilər.

Alimlər belə qənaətə gəliblər ki, onkoloji xəstəliklərin profilaktikasında ən yaxşı üsul arıqlamaqdır.