Bəzi qidaların tərkibinə rəng, dad, struktur vermək üçün vurulan maddələr xərçəng riskini artırır.

Bu sözləri Axar.az-a tibb elmləri doktoru, professor Adil Qeybulla deyib. O bildirib ki, xərçəng xəstəliyi orqanizmin nəzarətində olan hüceyrələrin bölünərkən nəzarətdən çıxması hadisəsidir:

"Nəzarətdən çıxan hüceyrələr orqanizmin resursları hesabına artıb çoxalır və son nəticədə orqanizmin məhvinə gətirib çıxarır. Xərçəng hüceyrələri əslində bütün orqanizmlərdə var. Onlar əmələ gəlir və orqanizm onu bədəndən xaric edir. Lakin bəzi situasiyalarda orqanizm onu xaric edə bilmir və onlar artıb çoxalır. Xərçəngi törədən konserigen maddələr adlanır. Bu maddələr müxtəlifdir. Onların içində texniki istifadə olunan maddələr var ki, ən çox asfaltda, neft məhsullarında olur.

Bu gün iri şəhərlərdə xərçəngin havada əmələ gəlmə riski müəyyən edilib. Bundan başqa, qidaların tərkibinə rəng, dad, struktur vermək üçün vurulan "qida əlavələri" deyilən maddələr var ki, bunların da bəziləri konserigen təsirlidir və bəzilərinə müxtəlif ölkələrdə qadağa qoyulub".

A.Qeybulla bildirib ki, yağın həddən artıq qaynaması onlarda sərbəst radikallar əmələ gətirir ki, bu da orqanizmdə xərçəng riskini artırır:

"Radiasiya, qıcıqlandırıcılar, viruslar və s. xərçəng törətmək qabiliyyətinə malikdir. Qidaların tərkibində olan konserigen təsir daşıyan bu cür maddələr orqanizm üçün təhlükəlidir. Ona görə də ərzaq təhlükəsizliyi konsepsiyası dünyanın hər yerində milli təhlükəsizlik konsepsiyasının tərkib hissəsi hesab olunur. Çünki bu, genefonda birbaşa bağlı məsələdir.

Məsələn, kolbasa məhsullarının rəngi əslində çox solğun olur. Ona rəng vermək üçün müxtəlif nitratlardan istifadə edirlər. Bu nitratlardan istifadə edərək kolbasa məhsullarına görkəm vermək düzgün deyil. Sovetlər dövründə bunun dərəcəsi var idi. İndi isə bu hədd yoxdur. Bu mənada bu məhsulların hazırlanması ilə bağlı standartlar olmalıdır. Yaxşı olar ki, görkəm üçün vurulan qatqılardan imtina olunsun.

Digər tərəfdən, kolbasa məhsullarında istifadə olunan ətin keyfiyyət parametrləri də yoxlanılmalıdır".