Bir ay ərzində gigiyenik normalara cavab verməyən qida məhsulları istehsal edən 29 müəssisə sahibkarı cərimələnib.

Bu barədə Axar.az-a Səhiyyə Nazirliyinin mətbuat xidmətindən məlumat verilib.

Məlumata görə, nazirlik müəssisələrdə sanitar gigiyenik qaydalara daim nəzarət edir və qeydə alınan nöqsanlarla bağlı müvafiq tədbirlər görür.

Nazirliyin apardığı yoxlamalar zamanı sentyabrda yeyinti məhsullarının istehsalı, satışı, saxlanması və daşınması zamanı sanitariya norma və qaydalarının tələblərini pozan, laboratoriya müayinələrinin nəticələrinə görə gigiyenik normalara cavab verməyən məhsulları istehsal edən müəssisələr aşkarlanıb.

29 müəssisənin sahibkarı inzibati qaydada cərimə olunub. 11 obyektin istismarının dayandırılması barədə isə qərar qəbul edilib, 1 nəfər işdən müvəqqəti kənarlaşdırılıb.

Orqanoleptik və fiziki-kimyəvi göstəricilərinə görə 254, mikrobioloji göstəricilərinə görə 219 yeyinti məhsulları nümunələri laboratoriya müayinələrinə cəlb olunub.

Orqanoleptik və fiziki-kimyəvi göstəricilərinə görə 4 nümunədə normalardan kənara çıxma müəyyən olunub.

Şadlıq evləri və iaşə müəssisələrindən 885 yaxma götürülüb, yaxma nümunəsində mikrobioloji çirklənmə aşkar edilməyib.

Mütəmadi olaraq aparılan belə araşdırmalara səbəb sentyabr ayı ərzində əhali arasında 39 qida zəhərlənməsinin baş verməsi və 66 nəfərin zərərçəkməsi olub. O cümlədən, bu ay 2 botulizm hadisəsi baş verib ki, nəticədə 2 zərərçəkən olub.

Bu qida zəhərlənməsi hadisələrinin hamısı məişətdə baş verib.