İran parlamentinin Milli Təhlükəsizlik və Xarici Siyasət Komissiyasının üzvləri Prezident Məsud Pezeşkianla birgə keçirdikləri iclasda İranın xarici siyasət prioritetlərini, o cümlədən Azərbaycanla münasibətlərin indiki vəziyyətini müzakirə ediblər.

Axar.az xəbər verir ki, bu barədə komissiyanın sözçüsü İbrahim Rzayi məlumat verib.

Rzayinin sözlərinə görə, görüşdə bəzi qonşu ölkələrlə, xüsusilə də Azərbaycanla münasibətlərin yenidən nəzərdən keçirilməsi zərurəti vurğulanıb. Qeyd olunub ki, İranın xarici siyasətindəki “qırmızı xətlərinə” riayət edilməli və bu çərçivədə Azərbaycanla münasibətlər düzgün formada tənzimlənməlidir:

“İclasda qonşu ölkələrlə əlaqələrin təhlükəsizlik və milli maraqlar əsasında qurulması kimi məsələlər də müzakirə olunub. Komissiya üzvləri İsrailin bölgədəki addımlarına qarşı sərt mövqe və diplomatik reaksiyanın zəruriliyini vurğulayaraq, bu çərçivədə Azərbaycanla münasibətlərin daha diqqətli və ayıq siyasətlə aparılmalı olduğu bildirilib”.