ABŞ ərazisində Dağlıq Qarabağ münaqişəsinin Azərbaycanın xeyrinə danışıqlar yolu ilə həll edilməsi mümkün deyil.

Bu sözləri Axar.az-a rus tarixçi və politoloq Oleq Kuznetsov rəsmi Vaşinqtonun Azərbaycan və Ermənistan XİN rəhbərlərinin növbəti görüşünün ABŞ-da keçirilməsi haqda olan təklifini şərh edərkən deyib.

“Dağlıq Qarabağ münaqişəsinin həllində ABŞ-ın roluna gəldikdə, eyni şeyi söyləyəcəyəm. 1992-ci il noyabrın 24-də ölkədə Azadlığın Müdafiəsi Aktı adlı bir milli qanun qəbul edildi. Bu qanunun 907-ci maddəsinin rus dilinə tərcüməsində məzmunu kontekstdə belə görünür: ABŞ hökuməti Ermənistan və Dağlıq Qarabağa iqtisadi blokada tətbiq olunduğu və digər zorakılıq aktları törədildiyi müddətdə Azərbaycan hökumətinə texnoloji və hərbi-texniki yardım göstərməyəcək”, – deyə politoloq bildirib.

Ekspertin sözlərinə görə, Amerika, Rusiyadan və Fransadan fərqli olaraq, qanunvericilik səviyyəsində uzun illərdir ki, Qarabağ separatçılarına açıq dəstək verir:

“Dövlət katibi Pompeo da ABŞ-da dialoqun və müzakirələrin gedişatının növbəti mərhələsində Azərbaycan nümayəndə heyətini Qarabağ məsələsində güzəştə çağıracaq.

ABŞ-ı Dağlıq Qarabağ siyasətini dəyişməyə məcbur etmək üçün yalnız bir yol var: Vyetnamın zamanında Sayqonu məhv etdiyi kimi, bu terrorçu qondarma dövləti müharibə yolu ilə məhv etmək.

ABŞ ərazisində Dağlıq Qarabağ münaqişəsinin Azərbaycanın xeyrinə danışıqlar yolu ilə həll edilməsi mümkün deyil”.