ABŞ, Avropa Birliyi və Rusiyanın yüksək rütbəli rəsmiləri İstanbulda Qarabağdakı vəziyyətlə bağlı gizli danışıqlar aparıblar.

Axar.az xəbər verir ki, bu barədə “Politiko” öz mənbələrinə istinadla yazıb.

Yüksək səviyyəli diplomatın iddiasına görə, sentyabrın 17-də keçirilən görüşdə Qarabağdakı “blokada”, Ermənistandan gələn humanitar yardımların buraxılması üçün Bakıya təzyiqlərin edilməsi müzakirə edilib.

Nəşr bildirib ki, görüşdə ABŞ-ı Vaşinqtonun Qafqaz danışıqları üzrə baş müşaviri Lui Bono, Avropa Birliyini Toivo Klaar, Rusiyanı Prezidentin Ermənistanla Azərbaycan arasında əlaqələr üzrə xüsusi nümayəndəsi İqor Xovayev təmsil edib.

Ən maraqlı nüanslardan biri ABŞ, AB və Rusiyanın görüş keçirməsi və heç vaxt ortaq mövqe nümayiş etdirməyən Qərbin bu məsələdə Rusiya ilə "birləşə" bilməsidir. "Politoko" nəşri də bu güclərin Qarabağ məsələsində "birləşməsinə" təəccübünü gizlətməyib.

Bu görüşdən cəmi 2 gün sonra – 19 sentyabrda Azərbaycan Ordusunun ildırımsürətli antiterror tədbiri keçirməsi və 24 saat müddətində bütün problemləri həll etməsi diqqət çəkir. Belə ki, Qarabağın “blokadası” ətrafında regiondan kənar böyük güclərin qurmağa çalışdığı oyunu Bakı gözlənilmədən darmadağın edib və hər kəsi fakt qarşısında qoyub.