Azərbaycan Hava Yollarının (AZAL) donanmasına daxil edilən ilk “Airbus A321neo” təyyarəsinin təqdimat və təhvil tədbirləri hazırda Almaniyanın Hamburq şəhərində keçirilir.

Axar.az Teleqraf-a istinadla xəbər verir ki, tədbir “Airbus”, AZAL və “AerCap” şirkətlərinin birgə təşkilatçılığı ilə baş tutub. Mərasimdə Azərbaycan Hava Yollarının və “Airbus” konserninin rəhbərliyi, “AerCap” şirkətinin nümayəndələri, eləcə də müxtəlif ölkələrdən dəvət olunmuş media təmsilçiləri iştirak edirlər.

Tədbir çərçivəsində “Airbus A321neo” təyyarəsinin texniki xüsusiyyətləri və istismar imkanları barədə məlumat verilib. Daha sonra təyyarənin milli aviadaşıyıcıya rəsmi təhvil verilməsi mərasimi baş tutacaq.

Qeyd edək ki, “Airbus A321neo” yeni nəsil mühərrikləri, yüksək yanacaq səmərəliliyi və sərnişin komfortu ilə seçilən müasir hava gəmilərindən biridir.

Təyyarənin AZAL-ın donanmasının modernləşdirilməsi və marşrut şəbəkəsinin genişləndirilməsi baxımından mühüm əhəmiyyət daşıdığı bildirilir.