Ana səhifə Toplum |
Bu gün Milli Məclisin Səhiyyə Komitəsinin iclası keçirilib.
Axar.az xəbər verir ki, millət vəkili Qənirə Paşayeva iclasda autizmli xəstələrin problemlərini qaldırıb. Q.Paşayeva bildirib ki, bu sahədə təcili olaraq qanun və dövlət proqramının qəbul olunmasına, bu uşaqların təhsil, təlim və reabilitasiyası üçün xüsusi mərkəzin yaradılmasına ehtiyac var:"
Bu gün autizmdən əziyyət çəkən bəzi uşaqlar və onların ailələri ilə görüşdük, Milli Məclisdən onların üzləşdiyi problemlərin həlli istiqamətində addımlar atmasını xahiş edirdilər".
Aprelin dünyada autizmli xəstələrlə bağlı ay elan olunduğunu deyən Qənirə Paşayeva övladları autizm sindromundan əziyyət çəkən ailələrin Milli Məclis və Hökumətdən bunu gözlədiyini deyib.
Autizmli uşaqlara zamanında yardım göstərməklə onların həyatını, gələcəyini çox hallarda xilas etməyin mümkün olduğunu deyən Qənirə Paşayeva müalicələrin bahalı olması, bu sahədəki mütəxəssislərin azlığı, əhali arasında bu istiqamətdə maarifləndirilmənin zəifliyinin ailələri xəstəliklə mübarizədə çətin vəziyyətdə qoyduğunu deyib. Ona görə də qanunvericilikdə bu məsələnin öz həllini tapması ilə bərabər autizmli uşaqların təhsil, təlim və reabilitasiyası üçün xüsusi mərkəzin yaradılmasına ciddi ehtiyac olduğunu deyib.
Tarix
2017.03.30 / 19:07
|
Müəllif
Axar.az
|