NRYTN Məlumat Hesablama Mərkəzi tərəfindən yaradılan “Açıq Hökumət Məlumatları” portalı www.data.gov.az-ın yeni versiyasının təqdimatı keçirilib.

Axar.az xəbər verir ki, bu barədə məlumatı Azərbaycan İnternet Forumunun prezidenti Osman Gündüz qeyd edib. O bildirib ki, təqdimat keçmiş Nəqliyyat Nazirliyinin binasında keçirilib:

“Portalda vəziyyət əvvəlki dövrlərə nisbətən müsbət istqamətdə müəyyən qədər dəyişib. Məlum olduğu kimi, uzun müddət heç bir nazirlik bura ictimai informasiya bazalarını yerləşdirmirdi. Bu gün məlum oldu ki, Statistika Komitəsi, ƏƏSM Nazirliyi, Mədəniyyət və Turizm Nazirliyi tərəfindən ötən müddət ərzində xeyli informasiya portala yerləşdirilib.

Bununla belə ötən toplantılarda da qeyd edilən məsələlər - məlumat bazalarının bu portalda məcburən yerləşdirilməsi ilə bağlı qanunvericilik bazasının, ictimai əhəmiyyət kəsb edən məlumat bazalarının siyahılarının, yenidən emal olunacaq məlumat bazalarının hazırlanması ilə bağlı ciddi maliyyə təminatlarının yaradılması və digər istiqamətlərdə hələlik konkret addımlar atılmayıb”.