"Qış və yay tətilində nədənsə kənara çəkilməkdən daha çox vaxtımı dəyərli keçirməyi üstün tuturam".

Bu sözləri Axar.az-a açıqlamasında millət vəkili Fazil Mustafa yay tətilində işləməyi üstün tutmağının səbəbini izah edərkən deyib.

O deyib ki, yay tətilində işlərini davam etdirməsi istirahət etməməsi anlamına gəlmir:

"İstirahət də edirəm, dənizə də gedirəm, idmanla da məşğul oluram. Xüsusilə də vaxtım olan kimi futbol oynamağı çox sevirəm. Açığı desəm, ölkədən kənarda istirahət etməyi elə də xoşlamıram. Bakı bağlarında dincəlmək mənə daha xoşdur, nəinki xaricə getmək. Belə olan halda həm işləyə, həm də istirahət edə bilirəm. Mən hər zaman mətbuat işçilərini çox yaxşı anlamışam və bu baxımdan da jurnalistlərin işinin hər zaman sərhəd tanımadığını düşünmüşəm. Jurnalistika dördüncü hakimiyyət hesab olunur. Buna görə də onların işinə hər zaman vaxt ayırmaq və eyni zamanda bununla əlaqədar olaraq sosial şəbəkələrdə paylaşımlar etmək, sizin vasitənizlə cəmiyyəti bilgiləndirmək borcumuzdur. Mənim üçün istirahətin bu alternativi çox əlverişlidir. İşləməklə yanaşı, həm də istirahət etmək daha zövqlüdür".

Millət vəkili bir ay sonra işıq üzü görəcək kitabından da söz açdı:

"Çoxdandır üzərində çalışıdığım "Azərbaycanda türk kimliyi və saxta tarix problemi" adlı kitabımın redaktəsi üzərində çalışıram. Bu, irihəcmli bir əsərdir. Kitabın artıq nəşriyyatda texniki işlərinin tamamlanmasına az qalıb. Təxminən bir aydan sonra işıq üzü görəcək".