Füzuli rayonu ictimaiyyətinin nümayəndələri Qurban bayramını cəbhə xəttində düşmənlə üz-üzə xidmət edən əsgərlərlə birgə keçiriblər.

AzərTAc xəbər verir ki, qonaqlar ön xətdə xidmət edən əsgərlərimizin vəziyyəti ilə maraqlanıb, xidmət və məişət şəraiti ilə tanış olub, onlarla səmimi söhbətlər aparıb, Vətənin keşikçilərinə bayram sovqatları çatdırıblar.

Hərbi hissənin şəxsi heyəti ilə keçirilən görüşdə çıxış edənlər bayram münasibətilə əsgərlərimizi təbrik edib, onlara çətin və şərəfli xidmətlərinin yerinə yetirilməsində müvəffəqiyyətlər arzulayıblar. Görüşdə Qurban bayramının fəzilətlərindən danışılıb, Allah-Təaladan işğal altında olan torpaqlarımızın azad edilməsi, haqq-ədalətin təmin olunması dilənib. Əminliklə bildirilib ki, qüdrətli Azərbaycan ordusu işğal altında olan torpaqlarımızın azad edilməsində öz qəti sözünü deyəcək və üçrəngli, ay-ulduzlu bayrağımız yenidən doğma Qarabağımızda dalğalanacaqdır.

Xidmətdə fərqlənən bir qrup zabit və əsgərə fəxri fərmanlar təqdim edilib.

Hərbi hissənin komandanlığı bu cür görüşlərin əsgərlərə mənəvi dəstək olduğunu, onlarda ruh yüksəkliyi yaratdığını vurğulayaraq, Füzuli rayonu ictimaiyyətinə minnətdarlığını bildirib.