Şəmkirdə yas qadağaları davam edir.

Axar.az-a verilən məlumata görə, bu gün rayonun Keçili kənd sakini Cəfər İsayevdən qohumunun yas məclisində yemək süfrəsi açmamaq tələb edilib. Rayonda oxşar vəziyyətlə Tural Qurbanov adlı sakin də üzləşib.

İcra və bələdiyyə nümayəndələri oktyabrın 28-də yas mərasimlərinə qabaqcadan gedərək ehsan qadağasını xatırladıblar.

Məlumatda deyilir ki, icra nümayəndələri yas düşən evlərdə tədarük görən hüzr sahiblərinə xəbərdarlıq edirlər. Şəmkirdən gələn xəbərlərə görə, yasda yalnız halva, göyərti, çörək, çay, xurma və qənd icazəsi var.

Keçili kənd bələdiyyə sədri Vahid Verdiyev ehsan vermək istəyən və israfçılıq edən şəxsləri kasıblara kömək etməyə, körpü salmağa, yol düzəltməyə çağırıb. İcra başçısının müavini Fəxrəddin Vəliyevin isə ANS-ə verdiyi məlumata görə, rayonun ağsaqqalları yığışıb, qərar veriblər ki, ehsan təmtəraqlı olmasın.