Nobel prospektində piyadalar üçün yeni yeraltı keçid tikilir.

"Azəryolservis" ASC-dən Axar.az-a verilən məlumata görə, "Bakı Ağ şəhər" layihəsi çərçivəsində paytaxtın Nobel prospektinin Xaqani Rüstəmov küçəsi ilə kəsişməsində yeni yeraltı piyada keçidinin tikintisi davam etdirilir.

Layihəyə görə, piyada keçidinin dörd giriş-çıxışı olacaq. Çıxışlardan biri "Ağ şəhər"ə, digəri Azərbaycan Boks Federasiyasına, qalan ikisi isə dənizkənarı park istiqamətinə açılacaq. Keçiddə hər tərəfində 2-si olmaqla 8 eskalator quraşdırılacaq.

Yeraltı piyada keçidinin uzunluğu 280 metr, eni 8 metr, hündürlüyü isə 3,2 metr nəzərdə tutulub. Keçidin Boks Federasiyasına olan çıxışı bəzək işləri istisna olmaqla hazırdır. Dənizkənarı park istiqamətində isə işlərin 50 faizi artıq yekunlaşıb.