Azərbaycan Milli Elmlər Akademiyası (AMEA), Azərbaycan Respublikasının Rabitə və Yüksək Texnologiyalar və Təhsil nazirliklərinin təşkilatçılığı ilə keçirilən Azərbaycan alimlərinin I Qurultayında maraqlı hadisə yaşanıb.

Axar.az xəbər verir ki, Azərbaycan alimlərinin I Qurultayına Bakı Dövlət Universitetinin sosiologiya kafedrasının müdiri, professor, fəlsəfə elmləri doktoru İzzət Rüstəmov buraxılmayıb. Qapıdan geri qaytarılan professora adının qurultay iştirakçıları sırasında olmadığı bildirilib.

Qurultayada iştirak etməsinə izn verilməyən qocaman professor İ.Rüstəmov geri qayıtmalı olub.

Xatırladaq ki, İ.Rüstəmov 1999-2004-cü illərdə Baki Dövlət Universitetinin beynəlxalq əlaqələr üzrə prorektoru vəzifəsində işləyib. 2004-cü ildən indiyədək Bakı Dövlət Universitetinin "Sosiologiya" kafedrasının müdiri vəzifəsində çalışır. O, 100 məqalənin, 4 monoqrafiyanın, 7 kitabın müəllifidir.

Həmçinin, qurultaya buraxılmayan professor 1991-ci ildə Akademik S.İ.Vavilov adına medalla, 2007-ci ildə Azərbaycan Respublikasının "Qabaqcıl təhsil işçisi" döş nişanı ilə, 2009-cu ildə Azərbaycan Respublikasının Prezidentinin sərəncamı ilə "Şöhrət ordeni" ilə təltif olunub. 20 elmlər namizədi və 5 elmlər doktoru yetişdirmiş, hazırda 2 nəfərin doktorluq dissertasiyası üzrə elmi məsləhətçisi olan İ.Rüstəmov 1994-1999-cu illər ərzində Azərbaycan Respublikası Baş nazirinin müavini vəzifəsində çalışıb.