Ötən gün zəhərlənmə diaqnozu ilə xəstəxanaya yerləşdirilən Quba rayonunun Dəlləkli kənd sakinlərinin vəziyyəti normaldır.

Bu barədə Axar.az-a Quba Rayon Mərkəzi Xəstəxanasından bildirilib.

“Zəhərlənmə diaqnozu ilə xəstəxanamıza müraciət edən şəxslərin hamısı pomidor və toyuq yediklərini bildiriblər. Ehtimal ki, zəhərlənmə də bu səbəbdən baş verib. Hazırda xəstəxanada müalicə alan 5 nəfərin vəziyyəti yaxşıdır. Ola bilsin, bu günün sonuna doğru evə buraxılsınlar”, - deyə o qeyd edib.

Azərbaycan Qida Təhlükəsizliyi Agentliyindən saytımıza bildirilib ki, Quba rayonunun Dəlləkli kəndində qeydə alınan kütləvi zəhərlənmə faktı ilə bağlı hazırda araşdırma aparılır:

“Agentliyin əməkdaşları tərəfindən həmin şəxslərin qəbul etdikləri qidalardan nümunələr götürülərək ekspertizadan keçirilməsi üçün Qida Təhlükəsizliyi İnstitutunun müvafiq laboratoriyalarına təqdim edilib. Laborator müayinələr nəticəsində hadisənin qida zəhərlənməsi olub- olmaması müəyyən ediləcək”.

Qeyd edək ki, ötən gün Quba rayonunda Dəlləkli kəndi ərazisində zəhərlənmə hadisəsi baş verib. Hadisə nəticəsində həmin kəndin sakinləri - 1952-ci il təvəllüdlü Zöhrə Ramiz qızı Hüseynova, 2008-ci il təvəllüdlü Bilal Bayram oğlu Ömərov, 2011-ci il təvəllüdlü Ömər Bayram oğlu Ömərov, 1987-ci il təvəllüdlü, Mavigül Mövlud qızı Ömərova və 1988-ci il təvəllüdlü Rəhilə Radixan qızı Ömərova ağır vəziyyətdə xəstəxanaya yerləşdiriliblər. Onlara qida zəhərlənməsi və kəskin qastroenterit diaqnozu qoyulub.