Azərbaycanın ilk ödənişli yolu kimi inşa edilən Bakı-Ələt-Astara-İran yolunun keyfiyyəti və rahatlığı sakinləri qane etsə də, yoldan istifadə edən şəxslər yolboyu ərazilərdə yanacaqdoldurma məntəqələri və kafe-restoranların azlığından gileylənirlər.

Onlar sözügedən yolun kənarında bir neçə yanacaqdoldurma məntəqəsi və kafe-restoranın tikilməsinin zəruri olduğunu bildirirlər.

Məsələ ilə bağlı Axar.az-a danışan Azərbaycan Avtomobil Yolları Dövlət Agentliyinin mətbuat katibi Anar Nəcəfli bildirib ki, Ələt-Astara yolunun üzərində ictimai iaşə obyektlərinin tikilməsi üçün xüsusi yerlər ayrılıb:

“Həmin yol boyu müxtəlif iaşə obyektlərinin inşası ilə AAYDA məşğul olmur. Yol boyu yanacaqdoldurma məntəqələrinin, eləcə də ictimai iaşə obyektlərinin tikilməsi üçün bir neçə hissədə müvafiq yerlər ayrılıb. İnvestorlar özləri həmin ərazidə obyekt tikməkdə maraqlı olmalıdırlar. Bunun üçün şirkət və ya hər hansı qurumların xərc çəkib xüsusi yerlər almasına ehtiyac yoxdur. Sadəcə olaraq şirkətlər və ya qurumlar tikinti üçün icazə sənədlərinin toplanması kimi prosedurlardan keçərək, xüsusi texniki şərtlər əsasında restoran, kafe, yanacaqdoldurma məntəqəsi, avtoservislər və s. inşa edə bilərlər”.