Xırdalan şəhər M.Mirqasımov küçəsinin sakinləri Azərsu Açıq Səhmdar Cəmiyyətinin sözügedən ərazidəki yolda apardığı təmir-bərpa işlərinin hələ də yekunlaşmadığını bildiriblər.

Şəhər sakini Ayaz Qasımov redaksiyamıza göndərdiyi məktubda həmin ərazidə uzun müddətdir asfalt vurma briqadasının işlədiyini və problemin hələ də həll olunmadığını deyib. O qeyd edib ki, “Azərsu” bu ərazidə kanalizasiya xətlərində iş apararkən yol yararsız hala düşüb. Bundan sonra isə qurum təmir işləri həyata keçirəcəyini bildirib, lakin xeyli müddət keçsə də, işlər yekunlaşmayıb.

Məsələ ilə bağlı Axar.az-a danışan Azərsu ASC-nin İctimaiyyətlə əlaqələr şöbəsinin rəisi Anar Cəbrayıllı bildirib ki, bu, qısa müddətdə həll olunacaq işlər deyil:

“Hazırda orada bir neçə asfalt vurma briqadası işləyir. Hər gün özüm də bu işlərlə yaxından maraqlanıram, orada işlər gedir. Azərsu Açıq Səhmdar Cəmiyyətinin qurumu haranı qazıbsa, oranı asfaltla təmin edəcək”.