Ana səhifə Toplum |
Azərbaycanda din adamlarının evlərinin qarət olunması tendensiyaya çevrilir.
Axar.az xəbər verir ki, son bir həftədə iki ilahiyyatçının mənzilindən külli miqdarda qiymətli əşya aparılıb.
Əvvəlcə, ilahiyyatçı Elşad Mirinin evi yarılıb. E.Miri ANS-ə deyib ki, evdən əllərinə keçən pul, qızıl, bahalı əşya və texnikaları aparıblar. Polis araşdırmalarından sonra ona dəyən ziyanın 50 min manat olduğu müəyyənləşdirilib.
Qafqaz Müsəlmanları İdarəsinin (QMİ) Salyan və ətraf 6 rayon üzrə qazısı Hacı Hüsnü Həsənovun evindən isə külli miqdarda qızıl-zinət əşyaları və şəxsi silahı oğurlanıb.
H.Həsənov APA-ya deyib ki, yanvarın 31-də səhər saatlarında naməlum şəxs və ya şəxslər pəncərədən evə girib. Oğrular evdən təxminən 100 min manat dəyərində qızıl-zinət əşyaları və rəsmi sənədi olan "Vinçester" markalı silahını aparıblar. Həmin vaxt ailəsi ilə İranda müalicə aldığını deyən QMi nümayəndəsi bildirib ki, hadisə baş verərkən evdə heç kim olmayıb.
Bu hadisələrin bir-biri ilə rabitəsi olmasa da, ardıcıl baş vermələri şübhə doğurur. Ehtimal olunur ki, ya hər iki evi yaran eyni qruplaşmadır, ya da oğrular din adamlarının daha dövlətli olduğunu güman edirlər.
Tarix
2015.02.04 / 00:19
|
Müəllif
Emin Aslanlı
|