Bakının Səbail rayonunda ağır yol qəzası baş verib.

Report xəbər verir ki, hadisə Neftçilər prospektində qeydə alınıb.

28 yaşlı Məmmədov Habil Valeh oğlu taksi qismində idarə etdiyi "Fiat" markalı avtomobillə prospekt boyu hərəkətdə olarkən Kukla Teatrının yaxınlığında arxadan eyni istiqamətlə gələn BMV markalı avtomobil qəfildən onun maşınına çırpılıb. Zərbənin gücündən "Fiat" markalı avtomobil bir neçə dəfə çevrilib. Nəticədə sürücü Habil Məmmədov hadisə yerində dünyasını dəyişib.

Yol qəzasının baş verdiyi əraziyə Səbail Rayon Polis İdarəsinin əməkdaşları cəlb olunub. Hadisə yerində müayinələr aparılıb. Məlumata görə, BMV markalı avtomobili Akif adlı sürücü idarə edirmiş. Elə avtoqəzanın da həmin avtomaşının yüksək sürətlə idarə edilməsi səbəbindən yaşandığı ehtimal olunur. Hadisə şahıdlərinin sözlərinə görə, BMV-ni idarə edən Akif adlı şəxs Baş Dövlət Yol Polisi İdarəsinin əməkdaşıdır. Yol qəzasının təfərrüatı başlanılan cinayət işi üzrə araşdırmalarından sonra məlum olacaq.