Səhifəmi təhqiredici şərhlərdən təmizləmək üçün gecə bağlamışdım. Kimsə özünü bloka atılmış sayıbsa, üzrlü saysın, bəzən yazılan təhqirlərə dözümüm çatmır.

Axar.az xəbər verir ki, bu sözləri növbədənkənar parlament seçkilərində deputat seçilən Erkin Qədirli səhifəsinə yazılan tənqidlərlə bağlı danışarkən deyib.

“Heç kimi bloka atmadım, səhifəm bağlı olub. Təhqirlərə gəlincə, o qədər çox olub ki, şərhləri bir-bir silmək yerinə, paylaşımları silməli oldum. Belə şərhlər daha çox saxta profillərdən yazılır, onları bir-bir oxumağa və təmizləməyə nə vaxtım çatır, nə də həvəsim olur. O biri yandan, siyasətçinin çox şeyə dözümlü olması tələb olunur. Etiraf edirəm ki, belə şeylərə dözümüm çatmır. Öyrənə biləcəyəmmi? Zaman göstərəcək. Bu da bir təcrübədir”, - deyə Qədirli qeyd edib.

Qeyd edək ki, Erkin Qədirli 16 saylı Yasamal ikinci seçki dairəsi üzrə lider namizəddir.