Azərbaycan Respublikasının Prezidenti yanında Gənclər Fondunun dəstəyi ilə "24 kadr" adlı film festivalı keçirilib. Layihənin rəhbəri Binəqədi Rayon İcra Hakimiyyəti başçısının müavini Aygün Əliyeva olub.

"Axar.az" xәbәr verir ki, filmlər peşəkar aktyor və rejissorlar tərəfindən qiymətləndirilib. Münsiflər heyətinin üzvləri Sinema" Gənc Kinematoqrafçılar Mərkəzinin sədri, "Start" Beynəlxalq Tələbə filmləri Festivalının direktoru, ssenarist Fehruz Şəmiyev, şair, yazıçı, tərcüməçi və ssenarist İlqar Fəhmi, aktyor, rejissor və rəssam Qurban Məsimov olub.

Festivalda "ən yaxşı ssenari" üzrə xüsusi mükafat Rüstəm İbrahimliyə verilib. "Ən yaxşı operator" işinə görə Asif Qəhrәmanov, "ən yaxşı aktyor" mükafatı ilə Səbuhi Bayramov, "ən gənc rejissor" kimi festivalın 6 yaşlı iştirakçı Mələk Bağıyeva mükafatlandırılıb. Ən yaxşı aktyor, rejissor və ssenari işinə görə 100 manat mükafat verilib.

"24 kadr" adlı film festivalında birinci yerə Leyla Qəmbərlinin "Fəridin dünyası", ikinci yerə Cavid Camalovun "Pul", üçüncü yerə Dilarə Vəliyevanın "Əlvida mənim dostum" filmləri layiq görülüb.

Qeyd edək ki, dekabrın əvvəllərində Rusiyanın paytaxtı Moskva şəhərində keçirilən "Beynəlxalq Televiziya və Kino Filmləri" festivalında "Ən yaxşı sənədli film nominasiyası"nın qalibi olan "Qağayı" filmi də "24 kadr" film festivalına göndərilən filmlər arasında idi. Lakin rus kinematoqrafçılarının "ən yaxşı" hesab elədikləri sənədli film heç bir nominasiya üzrə fərqləndirilməyib.