Milli Məclisin Mədəniyyət komitəsinin sədri, millət vəkili Qənirə Paşayeva “Səssiz Dünya" İşarət Dilində Danışan Əlillərə və İdmançılara Dəstək İctimai Birliyinin sədri Aidə Səfərova və sədr müavini, bloger Mahmud Səfərovla görüşüb.

Axar.az xəbər verir ki, görüş zamanı eşitmə və danışma imkanları məhdud olan şəxslərin bu sahədə olan problemləri ətraflı şəkildə müzakirə olunub.

Millət vəkili Qənirə Paşayeva İctimai Birliyin məqsədlərindən olan eşitmə və danışma imkanları məhdud olan şəxslərin maariflənməsi, işarət dilinin təbliği, bölgələrdə yaşayan eşitmə məhdudiyyətli şəxslərin təhsilə cəlb olunması və idmanın inkişafı sahəsində dövlət tərəfindən görülən tədbirləri təbliğ etməklərinin təqdirəlayiq olduğunu bildirərək, bu sahədə görülən tədbirləri dəstəklədiyini və bu sahədə yaranan problemlərin həllində hər zaman İctimai Birliyə dəstək olacağını bildirib.

Eşitmə və danışma imkanları məhdud insanlarımızın cəmiyyətə inteqrasiyası istiqamətində işlər görülməsinin vacibliyini vurğulayan Qənirə Paşayeva ictimai birliyin sədri Aidə Səfərovaya, onun eşitmə imkanları məhdud qardaşı Mahmud Səfərova gələcək işlərində uğurlar arzulayıb.