Sabunçu rayonunun, Zabrat-1 qəsəbəsi, Nərimanov küçəsi, 22A ünvanında ağacların zədələnməsi ilə bağlı daxil olan şikayəti Dövlət Ekoloji Təhlükəsizlik Xidmətinin əməkdaşları araşdırıblar.

Axar.az xəbər verir ki, xidmətin rəis müavini Ramal Bağırov araşdırma zamanı həmin ünvanda fərdi yaşayış evinin tikintisi məqsədilə qəsəbə sakini Məmməd Ramazanov tərəfindən qanunsuz olaraq 3 şam ağacının gövdəsinin üst hissəsindən budandığının üzə çıxdığını bildirib. Faktla bağlı təqsirkar barəsində akt və protokol tərtib edilib və o, 600 manat məbləğində cərimələnib.

R.Bağırovun sözlərinə görə, hazırda ağaclar bioloji inkişafdadır, bundan sonra da ağaclara qulluq olunması və zədələnməsi hallarına yol verilməməsi üçün M.Ramazanova məcburi göstəriş verilib.