Azərbaycan Yazıçılar Birliyinin (AYB) Güney Azərbaycan şöbəsinin sədri Saman Həsənzadənin (özünü Sayman Aruz kimi təqdim edir – red.) saxta diplom satışı ilə məşğul olması və əsasən güneyli yazarları, mədəniyyət-incəsənət adamlarını müxtəlif ədəbi təşkilatlara üzv edərək onlardan vəsait alması ilə bağlı Azərbaycan Respublikasının Baş prokuroru cənab Kamran Əliyevə saytımız adından rəsmi müraciət edilib.

Axar.az xəbər verir ki, müraciətdə Saman Həsənzadənin Güney Azərbaycandan olan yazarları, mədəniyyət-incəsənət adamlarını müxtəlif adlar altında fəaliyyət göstərən ədəbi təşkilarlara üzv edərək onlardan illik 70-80 AZN məbləğində vəsait alması, həmçinin Azərbaycan Yazıçılar Birliyinin adından saxta “Fəxri fərman” satması ilə Cinayət Məcəlləsinin 310-cu maddəsində nəzərdə tutulan cinayət əməlini törətməsinə şübhələr yaratdığından, məsələnin araşdırılması xahiş olunub.

Məsələ ilə bağlı fakt kimi foto və səs yazısı da Baş Prokurorluğa təqdim edilib.