11:09

Artıq iki gündür ki, paytaxtda taksi qiymətləri bahalaşıb.

Axar.az xəbər verir ki, məsafədən asılı olaraq, bütün taksi xidmətlərində 30-60 qəpik arasında, təxminən 10% miqdarında bahalaşma qeydə alınıb.

Bahalaşmanın səbəbi ilə bağlı taksi şirkətlərindən biri - “Salam Taksi”dən (*9933) saytımıza bildirilib ki, qiymət artımı Bakı Nəqliyyat Agentliyinin (BNA) göstərişi ilə həyata keçirilib.

“Bakı Nəqliyyat Agentliyi bütün taksi şirkətlərinin qiymətlərini qaldırmaqla bağlı göstəriş verib”, - deyə bildirilib.

BNA-nın mətbuat xidmətinin rəhbəri Mais Ağayev saytımıza açıqlamasında bildirib ki, Bakı Nəqliyyat Agentliyi tərəfindən taksi fəaliyyəti ilə məşğul olan hüquqi və fiziki şəxsə qiymətlərlə bağlı hər hansı bir göstəriş verilməyib:

“Bu barədə yayılan məlumat yalandır və həqiqəti əks etdirmir. Ümumiyyətlə, qiymət tənzimlənməsi ilə bağlı məsələ Bakı Nəqliyyat Agentliyinin səlahiyyətlərinə aid deyil”.

***

“Salam Taksi” şirkətinin direktoru Anar Ağayev redaksiya ilə əlaqə saxlayaraq, məlumatı verən şirkət əməkdaşının avqustun 1-dən işdən ayrıldığını bildirib:

“Onun dediyi sözlər həqiqəti əks etdirmir. Günün pik saatlarından asılı olaraq qiymətlər dəyişə bilər. Bununla bağlı BNA-dan heç bir göstəriş almamışıq”.