Azərişıq ASC Tovuz rayonunun Ağdam kəndində elektrik enerjisi təchizatını daha dayanıqlı və keyfiyyətli etmək üçün yenidənqurma işlərinə başlayıb.

ASC-nin mətbuat xidmətindən Axar.az-a bildirilib ki, qurumun ərazidəki əməkdaşları 24 saat fasiləsiz çalışaraq Ağdam kəndində mərmilərin zədələdiyi bütün xətləri bərpa etməklə sakinləri işıqsız qalmağa qoymayıb.

Prezident İlham Əliyevin birbaşa tapşırığı ilə ASC rəhbərliyi tərəfindən Ağdam kəndində yenidənqurma işlərinə başlamaqla düşmənlə üz-üzə dayanan kənd sakinlərinə və səngərdə əli tətikdə olan hərbçilərlə həmrəylik nümayiş etdirilib, onlara dövlətin dəstəyi göstərilib.

Xatırladaq ki, erməni silahlı qüvvələrinin bu il iyulun 12-də təxribat törədərək Ağdam kəndini atəşə məruz qoyması nəticəsində yaşayış evləri ilə yanaşı elektrik enerjisi xətlərinə də ciddi zərər dəymişdi.

Qeyd edək ki, Azərişıq ASC-nin rəhbərliyi tez-tez cəbhə xətti boyunca yerləşən kənd və yaşayış məntəqələrinə səfər edir, yerlərdə görülən işlərə şəxsən nəzarət edir. Əsas məqsəd xüsusilə həssas bölgələrdə yaşayan abonentlərimizə hər zaman dəstək olmaqdır.