Özünü Daxili İşlər Nazirliyinin əməkdaşı kimi təqdim edərək vətəndaşlardan külli miqdarda pul mənimsəyən şəxs barədə cinayət işi açılıb.

Baş Prokurorluqdan Axar.az-a verilən məlumata görə, Ədliyyə Nazirliyinin Penitensiar Xidmətindən daxil olmuş material üzrə Baş prokuror yanında Korrupsiyaya qarşı Mübarizə Baş İdarəsində aparılmış araşdırmalarla təsduiqlənib ki, Yevlax rayon sakini Həsən Əliyevin özünü Daxili İşlər Nazirliyinin Daxili Qoşunlarının məsul əməkdaşı kimi təqdim edib. Onun Ağdaş rayon sakininin övladını Penitensiar Xidmətin Şəki penitensiar müəssisəsinə işə qəbul etdirəcəyini vəd edərək 4 min 500 manat məbləğində pulunu aldatma yolu ilə ələ keçirməsində şübhələr üçün əsaslar müəyyən edildiyindən, fakta görə Cinayət Məcəlləsinin 178.3.2-ci (külli miqdarda ziyan vurmaqla dələduzluq) və 310-cu (vəzifəli şəxsin səlahiyyətlərini mənimsəmə) maddələri ilə cinayət işi başlanıb.

Hazırda cinayət işi üzrə istintaq davam etdirilir.