Hazırda sosial şəbəkələr informasiya mübadiləsində ən önəmli vasitələrdən birinə çevrilib.

Axar.az-ın məlumatına görə, Azərbaycan Respublikasının Baş Prokurorluğunun Mətbuat xidməti tərəfindən prokurorluq orqanlarının fəaliyyətinə dair məlumatların operativ şəkildə əhaliyə, o cümlədən kütləvi informasiya vasitələrinə çatdırılmasını təmin etmək üçün Feysbuk, İnstaqram, Tvitter, Yutub, Teleqram və Linkedin sosial şəbəkələrindən istifadə olunur.

Noyabrın 26-da isə Azərbaycan Respublikasının Baş Prokurorluğunun Feysbuk (link: https://www.facebook.com/prokurorluq/) səhifəsi rəsmi olaraq mavi nişan vasitəsi ilə təsdiqlənib.

“Verified Page”, yəni təsdiqlənmiş səhifə mənasını bildirən mavi nişanın köməyi ilə orijinal səhifəni saxta səhifələrdən ayırd etmək olar.

Baş Prokurorluğun Mətbuat xidməti Feysbuk səhifəsinin rəsmi olaraq mavi nişan vasitəsi ilə təsdiqlənməsinə Azərbaycan Respublikasının Rabitə və Yüksək Texnologiyalar Nazirliyi yanında Elektron Təhlükəsizlik Xidməti tərəfindən yardım olunduğunu bildirib.