Rusiya-Belçika oyununda İTV şərhçilərinin Rusiya millisi haqqında “bizimkilər” sözü işlətməsi iddialarına kanaldan da reaksiya verilib.

Axar.az xəbər verir ki, kanalın sosial şəbəkə hesabında bu cavab paylaşılıb:

“Rusiya-Belçika matçından sonra sosial şəbəkələrdə İTV şərhçilərinin Rusiya millisi haqda “Bizimkilər” ifadəsi işlətdiyi haqda müzakirələr aparılır. Biz axtardıq, tapmadıq. Bu ifadənin istifadə edildiyi hissəni kim tapıb göndərsə, onun hədiyyəsi bizimkilərdə”.

Qeyd edək ki, sosial şəbəkələrdə şərhçilərin Rusiya millisi haqda nəinki “bizimkilər”, hətta “kimimiz var hücumçulardan?", "yarımmüdafiədə kimlərimiz var ehtiyatda?" kimi fikirlərə də yer verdikləri iddia edilir.

Avropa çempionatının matçlarını İlqar Mikayıloğlu, Elnur Əşrəfoğlu və Asif Bağırov şərh edir.