Azərbaycan Demokratiya və İnsan Haqları İnstitutunun rəhbəri Əhməd Şahidov sentyabrın 1-də Şimali Kipr Türk Cümhuriyyətinin "Kanal T" televiziyasının səhər proqramının qonağı olub.

Axar.az xəbər verir ki, aparıcı Cenk Dilerin suallarını cavablandıran hüquq müdafiəçisi Dağlıq Qarabağ münaqişəsi və erməni vəhşilikləri haqqında danışıb.

Əhməd Şahidov hazırda Ermənistanda saxlanılan yüzlərlə azərbaycanlı əsirlərdən söz açıb, həmin şəxslər barədə kitabı nümayiş etdirib. Daha sonra kəlbəcərli əsirlər Dilqəm Əsgərov və Şahbaz Quliyev barədə məlumat verən ADİHİ rəhbəri ermənilərin keçirdiyi şou "məhkəmə"dən fotolar nümayiş etdirib, azərbaycanlı əsirlərin azad edilməsi üçün sonunadək mübarizə aparacaqlarını və Avropada bu məsələ ilə bağlı silsilə tədbirləri davam etdirəcəklərini bildirib.