Zəlzələnin başvermə səbəbləri ocaqların dərinliyində olan qırılmalar ilə əlaqədardır. Bu zəlzələ 1953 və 1963-cü illərdə də olub, indisə təkrarıdır.

Bu sözləri Axar.az-a Respublika Seysmoloji Xidmət Mərkəzinin baş direktoru Qurban Yetirmişli ölkənin şimal-qərb zonasında baş verən yeraltı təkanlarla bağlı deyib.

RSXM-nin baş direktorunun sözlərinə görə, şimal-qərb zonasında gərginlik əvvəlcədən var idi.

Q.Yetirmişli bundan sonra da bir neçə ay gərginliyin davam edəcəyini, kiçik təkanlar olacağını istisna etməyib: "Amma güclü zəlzələ gözlənilmir".

Qeyd edək ki, Göyçayda zəlzələ nəticəsində iki uşaq anası su quyusuna düşərək ölüb. Bu gün saat 09:49:36-da Şəki ərazisində zəlzələ qeydə alınıb. Zəlzələ episentrdə 7 bal, ətraf rayonlarda 6-5 bala qədər hiss olunub. Zəlzələ ocaqları 10-12 km dərinlikdə olub.