Payız-qış mövsümünə hazırlıq, avtomobil yollarının və yol qurğularının normal istismarı, hərəkətin fasiləsizliyini və təhlükəsizliyi məqsədilə işlərə start verilib.

Azəryolservis ASC-dən Axar.az-a verilən məlumata görə, işlər çərçivəsində Heydər Əliyev prospektinin "Sabunçu yol qovşağı"ndan (Komsomol dairəsi) Bakıxanov qəsəbəsinə gedən yolda səth sularının normal kənarlaşdırılması üçün yağış-kanalizasiya sisteminin qurulmasına başlanılıb.

Sisteminin qurulması üçün yolun kənarı 1,5-3,5 metr dərinlikdə qazılıb. Səth sularının normal axıdılması üçün 400 millimetr diametrlik borudan istifadə olunur. Hər 25-30 metrdən bir kanalizasiya quyuları qoyulur. Bundan sonra qazılan ərazinin üstü bərkidilərək, asfaltlanacaq və quyuların üzərinə yağış barmaqlıqları qoyulacaq.

Sözügedən ərazidə yağış-kanalizasiya sistemi olmadığı üçün yağış yağarkən, yolun kənarlarındakı yaşıllıq suvarılarkən axıdılan su yolun hərəkət hissəsinə yığılırdı. Bu isə nəqliyyat vasitələrinin hərəkətinə mane olur, yolun asfalt-beton örtüyünün yuyulmasına səbəb olurdu.