Bakıda keçirilən bal yarmarkasında yoxlamalar zamanı saxta bal aşkar edilib.

Kənd Təsərrüfatı Nazirliyindən Axar.az-a verilən məlumata görə, sərgi-satış yarmarkasına çıxarılan bal məhsulları rayonlarda zona baytarlıq laboratoriyalarında müayinədən keçirilib. Bal məhsulu olan qablar bağlanaraq möhürlənmiş və keyfiyyət göstəricilərini təsdiq edən müvafiq sənədlər əsasında arıçılıq məhsullarının müvəqqəti saxlanma anbarına təhvil verilib.

İşçi Qrupu tərəfindən salonda satılan arıçılıq məhsullarına nəzarət edilərkən laboratoriya müayinəsindən keçməyən, mənşəyi məlum olmayan, anbara təhvil verilməyən və qeydiyyata alınmayan hər biri 50 kq-dan artıq olan 13 ədəd balla dolu bidonların 21oktyabr 2015-ci il tarixdə yarmarkaya keçirilməsi faktı aşkar edilib.

İşçi Qrupu tərəfindən 7 arıçıya aid balla dolu olan bidonlar müvafiq qaydada aktlaşdırılaraq dərhal sərgi-satış yarmarkasından çıxarılıb. Həmin arıçılar da yarmarkadan kənarlaşdırılıb.