Bakı sakinləri "Airbus A321" avialaynerinin Misir səmasında qəzaya uğraması nəticəsində ölənlərə başsağlığı əlaməti olaraq Rusiya səfirliyinə güllər aparır.

Report-un əməkdaşı xəbər verir ki, diplomatik missiyanın binasının qarşısına gül buketləri qoyulub, şamlar yandırılıb. Qəza nəticəsində dünyasını dəyişən 20-dən çox uşağın xatirəsinə bəziləri səfirliyin qarşısına oyuncaqlar qoyub.

Matəm əlaməti olaraq, səfirlikdə Rusiya bayrağı aşağı endirilib.

Qeyd edək ki, şənbə günü Misirin Şarm əl-Şeyx şəhərindən Rusiyanın Sankt-Peterburq şəhərinə hərəkət edən "Koqalımavia" aviaşirkətinə məxsus "Airbus A-321" sərnişin təyyarəsi Sinay yarımadasının şimal-şərqində qəzaya uğrayıb. Təyyarənin göyərtəsində olan 217 sərnişin və 7 ekipaj üzvü hadisə zamanı dünyasını dəyişib.