Ana səhifə Toplum |
Azərbaycan Respublikası Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən görülən müvafiq tədbirlər nəticəsində Azərinşaatservis ASC gecikdirilmiş əmək haqqı borcunu işçilərə tam şəkildə ödəyib.
Axar.az xəbər verir ki, bu barədə məlumatı nazirlik yayıb.
Görülən tədbirlər nəticəsində 5 485 149 manat məbləğində gecikdirilmiş sosial xarakterli ödənişlərin işəgötürənlər tərəfindən işçilərə ödənilməsi təmin edilib. Bu məbləğin 43 faizi (2 362 875 manat) Azərinşaatservis ASC-nin işçilərə ödənilməsini gecikdirdiyi əmək haqlarından ibarət olub.
Ümumilikdə son illərdə Xidmət əmək haqqı və digər sosial xarakterli ödənişlərin işəgötürənlər tərəfindən işçilərə qanunvericiliyin tələblərinə uyğun şəkildə vaxtlı-vaxtında ödənilməsinə xüsusi diqqət yetirir.
Xatırladaq ki, 2015-ci il ərzində ödənilməsi təmin edilmiş gecikdirilmiş sosial xarakterli ödənişlərin 91,7 faizini (5 032 263 manat) əmək haqları, qalan hissəsini isə işəgötürənlər tərəfindən ödənilməli olan sosial müavinət və kompensasiyalar, zərərə görə ödənclər təşkil edib. Bundan başqa, ötən il işdən qeyri-qanuni şəkildə azad edildiyi müəyyən olunan 22 nəfərin Xidmət tərəfindən yenidən öz əvvəlki işinə bərpa olunması da təmin edilib.
Tarix
2016.01.11 / 13:13
|
Müəllif
Nilufər Muğantürk
|