Azərbaycan Dövlət Aqrar Universiteti əcnəbi professor müəllim və inzibati heyətin xərclər müqaviləsi çərçivəsində 3 müəllimlə 75,744 min manatlıq müqavilə imzalayıb.

Axar.az Teleqraf.com-a istinadən xəbər verir ki, ali təhsil müəssisəsi satınalma müqaviləsini Türkiyənin Ege Universitetinin müəllimləri Edip Açıl və Zülal Mətinər, eləcə də ADAU-nun “Bitki mühafizəsi” kafedrasının dosent əvəzi Lamiyə Quliyeva ilə imzalayıb. Müqaviləyə əsasən Edip Açıla 26,746.68 AZN, Zülal Metinerə 13,373.28 AZN, Lamiyə Quliyevaya 35,625 AZN ödəniləcək.

Razılaşmaya əsasən müəllimlərin fəaliyyəti bu ilin yanvar ayının 14-dən başlayıb, dekabr ayının 31-nə qədər davam edəcək.

Qeyd edək ki, müqavilə üzrə satınalma proseduru dövlət satınalmalarının vahid internet portalında keçirilməyib.

Xatırladaq ki, Dövlət Aqrar Universiteti “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Türkiyənin Ege Universitetinidən müəllim heyətinin cəlbinə 300 min manat xərcləyib. Ötən il əcnəbi professor müəllim və inzibati heyətin xərclər müqaviləsi çərçivəsində 13 müəllimlə müqavilə bağlanıb.