Rusiya tərəfi AZAL-ın təyyarəsində aşkar edilmiş yad elementlərin nümunələrini hələ də almayıb.

Axar.az Teleqraf.com-a istinadla xəbər verir ki, bu barədə Rusiya telekanalına ölkənin aviasiya xidmətindəki mənbə bildirib.

Mənbənin sözlərinə görə, aşkar edilmiş nümunələrə çıxış imkanı olmadığına görə xarici KİV-lərin təyyarənin “Pantsir” Hava Hücumundan Müdafiə raket sistemindən vurulması ilə bağlı iddiaları əlavə araşdırma tələb edir.

Qeyd edək ki, qəza ilə bağlı ilkin hesabatda AZAL təyyarəsinin qəzadan öncə "füzelyajını dəlib keçən" çoxsaylı zədələrin olması faktının aşkarlandığı bildirilir. Həmin zədələr hava gəmisinin füzelyajının arxa hissəsində, xüsusilə şaquli və üfiqi stabilizatorlarında çox sayda, habelə sol qanadda və sol mühərrikdə aşkar olunub.

"Röyters" isə Azərbaycan hökumətindəki mənbəyə istinadla təyyarənin "Pantsir"lə vurulmasını təsdiqləyən sübutların olduğunu, o cümlədən "Pantsir"in fraqmentlərinin tapıldığını bildirib.

Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi 2024-cü il dekabrın 25-də Qroznıda Rusiya HHM sistemi vasitəsilə vurulub. Enişinə icazə verilmədiyindən Qazaxıstana üz tutan təyyarə Aktau hava limanı yaxınlığında qəzaya uğrayıb. Təyyarənin göyərtəsindəki 67 nəfərdən 38-i həlak olub, 29-u sağ qalıb.