Azərbaycanda Beynəlxalq Qızıl Xaç Komitəsinin (BQXK) fəaliyyətinə heç bir ehtiyac qalmayıb.

Axar.az xəbər verir ki, bu barədə Teleqraf-a məlumatlı mənbələr bildirilib.

Qeyd olunub ki, rəsmi Bakı heç bir zaman təşkilatın işindən və tutduğu mövqedən razı olmayıb. Bu da səbəbsiz deyil.

“Beynəlxalq Qızıl Xaç Komitəsi 2020-ci illərin əvvəllərində Azərbaycana xəbər vermədən Xankəndində qanunsuz ofis açmışdı. Dəfələrlə Azərbaycan tərəfi qanunsuz rejimlə imzalanmış kağız parçasını istəsə də, komitə onu rəsmi Bakıya verməmişdi.

Bundan başqa, 2020-ci ilin Vətən müharibəsindən sonra və 2023-cü il antiterror əməliyyatlarına qədər Beynəlxalq Qızıl Xaç Komitəsi Xankəndidəki ofisini bağlamadı. Bu təşkilat Azərbaycanın ərazi bütövlüyünü, suverenliyini bərpa etməsini tanımırdı”, - məlumatlı mənbələr bildirib.

O da vurğulanıb ki, BQXK humanitar missiya adı altında qaçaqmalçılıqla məşğul olub, komitənin əməkdaşları Vətən müharibəsi zamanı Ermənistana casusluq edib, Azərbaycan Ordusunun Füzuli istiqamətində əməliyyatlarını dayandırmağa cəhd göstərib:

“Bütün bunları nəzərə aldıqda, hesab edirik ki, artıq bu təşkilata ehtiyac yoxdur”, - mənbə vurğulayıb.

Qeyd edək ki, Beynəlxalq Qızıl Xaç Komitəsinin Bakıdakı nümayəndəliyi 1992-ci il martın 3-dən fəaliyyət göstərirdi.