Azərbaycan və Rusiya Bakıda “Rus Evi” ətrafında yaranmış vəziyyətin nizamlanması üçün dialoqu davam etdirirlər.

Axar.az xəbər verir ki, bu barədə Azərbaycanın Rusiyadakı səfiri Rəhman Mustafayev bildirib.

“Dünən Azərbaycan Prezidentinin xüsusi tapşırıqlar üzrə nümayəndəsi Xələf Xələfovun Moskvaya işgüzar səfəri başa çatdı, Rusiya tərəfi danışıqlarda bu məsələni qaldırmışdı. Öz mövqeyimizi bildirdik ki, bütün bu təşəbbüslər, bütün bu layihələr ciddi şəkildə milli qanunvericiliyə uyğun şəkildə, tərəflər arasında artıq imzalanmış sazişlər əsasında həyata keçirilməlidir, belə sazişlər isə var. Odur ki, bəli, təklif var, bizim də əks mövqeyimiz var. Amma ən əsası dialoqun davam etməsidir. Bu, çox vacibdir”, - Mustafayev jurnalistlərə deyib.

Xatırladaq ki, fevralda Azərbaycan Xarici İşlər Nazirliyi “Rossotrudniçestvo”nun Azərbaycandakı nümayəndəliyi olan Rusiya İnformasiya və Mədəniyyət Mərkəzinin – “Rus Evi”nin hüquqi şəxs kimi qeydiyyata alınmadığını və qurumun Azərbaycan qanunvericiliyini kobud şəkildə pozduğunu açıqlamışdı. Bunun ardınca fevralın 3-də rəsmi Bakı “Rus Evi”nin fəaliyyətinin dayandırılması ilə bağlı Rusiya tərəfinə nota göndərib.

Bildirilib ki, bu cür təşkilatların Azərbaycan ərazisində fəaliyyəti milli qanunvericiliyə, ölkələr arasında qarşılıqlılıq prinsipinə və ikitərəfli əsasda əldə edilmiş razılaşmalara əməl olunması tələblərinə uyğun olaraq tənzimlənir.

Daha sonra, fevralın 11-də “Rus Evi” Azərbaycanda fəaliyyətini dayandırmaq proseduruna başlayıb.