Qənirə Paşayeva Tovuzda sakinlərlə görüşüb, onların problemləri ilə maraqlanıb.

Axar.az xəbər verir ki, millət vəkili sakinlərlə görüş zamanı ona müraciət edən xəstələrin yüksək səviyyəli müalicə almaları və əməliyyat olunmaları üçün Səhiyyə Nazirliyi ilə əlaqə saxlayaraq, onların Bakıda və ya rayonda xəstəxanalara yerləşdirilməsini təşkil edib.

Millət vəkili həmçinin həmin kəndlərdə fiziki imkanları məhdud insanların qayğıları ilə maraqlanıb və bu istiqamətdə Əmək və Əhalinin Sosial Müdafiəsi Nazirliyinə müraciətlər ünvanlayıb.

Sakinlər millət vəkili ilə görüşdə ön cəbhə rayonlarında ünvanlı sosial yardıma ehtiyacı olan insanların daha çox olduğunu, özəlliklə yeni iş yerlərinin artmasına xidmət edən layihələrin vacibliyini xüsusi vurğulayıblar.

Bəzi təkliflərin parlamentdə səsləndiriləcəyini deyən millət vəkili Qənirə Paşayeva Tovuzda şəhid Nağı Əmiraslanov adına Düz Qırıqlı kənd orta məktəbini də ziyarət edib, müəllimlərin problemləri ilə maraqlanıb.

Müəllimlər şəhidimizin adını daşıyan orta məktəbin artıq 91 ildir fəaliyyət göstərdiyini və binanın vəziyyətinin təhsil üçün çox yararsız olduğunu diqqətə çatdırıblar.

Q.Paşayeva məktəbin tikintisi üçün hökumətə və Təhsil Nazirliyinə müraciət etdiyini və problemin yaxın zamanda öz həllini tapması üçün şəxsən təkrar Təhsil naziri Mikayıl Cabbarova müraciət edəcəyini vurğulayıb.