Zərdab rayonu Qaravəlli kəndinin 111 yaşlı sakini Gülüstan Xəlilova da referendumda səs verib.

Azərtac xəbər verir ki, sentyabrın 26-da Konstitusiyamıza təklif olunan dəyişikliklərlə bağlı keçirilən referendumda iştirak etmək üçün Gülüstan Xəlilovanın evinə daşınan səsvermə qutusu gətirilib.

Gülüstan nənə ona bu şəraiti yaradanlara minnətdarlığını bildirib:

"Sağ olun ki, məni yaddan çıxarmamısınız. Əsas Qanunumuza olan dəyişikliyi nəvələrim mənə izah ediblər. Uzun ömür sürmüşəm, çox əzab-əziyyətlər görmüşəm. Bugünkü əmin-amanlıq heç də hər ölkəyə nəsib olmur. Bunun qədrini bilmək lazımdır. Arzum budur ki, yumruq tək birləşib, daim dövlətçiliyimizə sadiq olaq. Allah ölkəmizdəki bu əmin-amanlığı, sabitliyi daimi etsin".