Paytaxtın Binəqədi rayonu ərazisində tikilən məscid kompleksində tikinti işləri başa çatıb.

Axar.az xəbər verir ki, yaxın günlərdə Bakının ən böyük məscidinin açılışı gözlənilir.

Əldə etdiyimiz məlumata görə, hazırda məsciddə işlər yekunlaşsa da, həyətdə, ətraf ərazilərdə quruculuq işləri davam edir.

Məlumat üçün bildirək ki, məscid kompleksinin tikintisi üçün prezidentin ehtiyat fondundan ilkin olaraq 10 milyon manat vəsait ayrılıb. Yeni məscid kompleksi eyni vaxtda 2000-dən çox adama xidmət edəcək. Birmərtəbəli tikilinin əsas binasının hündürlüyü 40 metr, minarələrinin hündürlüyü isə 60 metr olacaq. Dörd minarəli ibadət evinin ölkədə ən hündür məscid statusu alacağı bildirilir.

Məscidin əsas salonu 900 kvadratmetr, qadınlar üçün nəzərdə tutulan digər salonu isə təqribən 350 kvadratmetr olacaq. Tikilinin zirzəmisi həm də avtomobil dayanacağı kimi istifadə ediləcək.