"Təəssüf ki, Ukrayna Rusiyaya kifayət qədər sanksiya tətbiq etmir. Krımı tamamilə təcrid edib, yarımadaya qida və su verməyi dayandırmaq lazım idi".

Axar.az xəbər verir ki, bu açıqlama ilə Krım tatarlarının lideri Mustafa Krımoğlu çıxış edib. O, Krımda müstəqil fikirli insanların FSB-nin təzyiqlərinə məruz qaldığını bildirib:

"Krım tatarları Krımın ilhaqını qəbul etmirlər. Rusiyanı və Krımın ilhaqını dəstəkləyənlər də artıq fikirlərini dəyişiblər. Lakin bunu dilə gətirməkdən çəkinirlər. Çünki buna görə FSB tərəfindən təzyiqlərə məruz qalırlar. Ukraynanın gizli xidmətləri effektli işləmir. Çünki Kiyevdə hələ də rus casusları dolaşır. İndi onların öhdəsindən gələ bilmirik, amma zamanla bunun qarşısını alacağıq".

Krım tatarlarının lideri Ukraynanın Krım siyasətində yanlışlıqlar olduğunu deyib:

"Rusiyaya qarşı tətbiq edilən sanksiyaların çox ciddi təsiri var. Rusiya artıq can verir. Sanksiyalara görə Rusiyanın qəsbkarlığı daha da artıb və bu ölümdən öncəki son qəsbkarlıqdır. Rusiyanın məhvini sürətləndirmək üçün sanksiyaları artırmaq lazımdır. Təəssüf ki, Ukrayna Rusiyaya kifayət qədər sanksiya tətbiq etmir. Krımı tamamilə təcrid edib, yarımadaya qida və su verilməsini dayandırmaq lazım idi".