Ermənistan hökuməti elektrik enerjisi tariflərinin qaldırılması səbəbindən əhaliyə ödəyəcəyi kompensasiyanı Vorotan su elektrik stansiyasının kaskadının ABŞ-ın "Contour Global" energetika holdinqinə satmaqla əldə edəcəyi vəsaitlərin hesabına ödəyəcək.

APA-nın xəbərinə görə, bunu Ermənistanın Baş naziri Ovik Abramyan bildirib. "Ermənistan prezidentinin bəyan etdiyi kimi, hökumət elektrik enerjisi tariflərinin qaldırılması ilə bağlı xərcləri subsidiya hesabına kompensasiya edəcək. Vəsaitlər qeyri-büdcə mənbədən - Vorotan su elektrik stansiyasının kaskadının satılması hesabına əldə ediləcək", - Abramyan bildirib.

Qeyd edək ki, avqustun 1-dən Ermənistanda elektrik enerjisi tarifləri 16,7 faiz qalxıb.

Bu qərar Ermənistan cəmiyyətində kəskin reaksiyaya və qərarın ləğv olunmasını tələb edən etiraz hərəkatının formalaşmasına səbəb olub.

ABŞ-ın "Contour Global" energetika holdinqi iyunun 8-də Ermənistan-İran sərhədində yerləşən Vorotan su elektrik stansiyasının kaskadının sahibi olub. Holdinq bu strateji əhəmiyyətli obyekti 180 milyon dollara əldə edib.