Bakının şadlıq evləri toy mərasimlərində yeni qaydalar tətbiq etməyə başlayıb.

Axar.az-a verilən məlumata görə, şadlıq sarayları toy məclislərinin gecə saat 12-dən tez yekunlaşmasını ənənə halına çevirir.

Restoran müdirlərinə bu barədə müvafiq tapşırıqlar verilib.

Toy mərasimlərinin ənənəvi vaxtdan bir qədər tez başa çatdırılmasına, süfrələrdən isti yeməklərin saat 9-dan sonra yığışdırılmasına göstəriş verilib.

Artıq bir neçə şadlıq sarayında toy saat 23:00-dan sonra yekunlaşır, süfrədə isə istisna yeməklər, meyvə və s. saxlanılır.

Buna səbəb kimi son vaxtlar toylarda qonaqların qidalardan zəhərlənməsi göstərilir. Sonuncu belə hadisə "Zəngəzur" restoranında baş vermişdi və nəticədə 77 nəfər xəstəxanaya yerləşdirilmişdi.

Toy mərasiminin vaxtından tez bitməsi isə islahatlar paketinin tərkib hissəsi kimi izah olunur.

Bu, məclislərdə kütləvi davaların qarşısını almaq, toy sahiblərinin işini nizamlamaq, hesabın ödənilməsi üçün daha münasib vaxt ayırmaq, o cümlədən restoranların xidməti personalının işini tezləşdirməklə əsaslandırılır.

Məlumatda bildirilir ki, bu günlərdə "Xarı bülbül" şadlıq evindəki toy məclisində qeyd olunan məqamlara rast gəlinib.

Qeyd edək ki, bəzi deputatlar da toy məclislərində israfçılığın aradan qaldırılması barədə təkliflər irəli sürüb.