Azərbaycan Milli Elmlər Akademiyasının vitse-prezidenti, akademik İbrahim Quliyev Almaniyanın Volksvagen fondunun nümayəndə heyəti ilə görüş keçirib.

AMEA-dan Axar.az-a verilən məlumata görə, İ.Quliyev Fondun Baş katibi Vilhelm Krulun rəhbərlik etdiyi nümayəndə heyətini qəbul edib.

Akademik qonaqlara ölkəmizdə elmin ən müasir sahələrinin inkişafına, multidissiplinar tədqiqatlara, gənc alimlərin yetişdirilməsinə göstərilən yüksək diqqət və qayğıdan danışıb.

Volksvagen Fondunun Baş katibi Vilhelm Krul isə səmimi qəbula görə təşəkkürünü bildirib. Bakıya ilk dəfə səfər etdiyini deyən qonaq xoş təəsüratlarını bölüşüb.

Baş katib qeyd edib ki, Volksvagen Fondu xüsusilə Azərbaycanda həyata keçiriləcək layihələrin maliyələşdirilməsində maraqlıdır.

Almaniyada təhsil alanların təhsillərini tamamladıqdan sonra ölkəyə qayıdıb fəaliyyət göstərmələri və tədqiqatlar aparmaları üçün lazımi infrastrukturun yaradılması məqsədilə birgə hazırlanacaq layihələrin də maliyələşdirilə biləcəyini qeyd edib.