Türkiyə İŞİD-i dəstəklədikcə, iki ölkə arasında viza rejiminin tətbiqi qərarı dəyişməyəcək.

Axar.az xəbər verir ki, bu sözləri Rusiya Dumasının Beynəlxalq məsələlər komitəsinin rəhbəri Aleksey Puşkov Türkiyə-Rusiya arasında viza rejiminin tətbiqi ilə bağlı yayılan informasiyanı şərh edərkən deyib.

"Ən önəmli faktor Rusiya və Türkiyə münasibətləridir. Türkiyə getdikcə bu münasibətləri gərginləşdirir. Bu dövlət Suriyada iğtişaşlara gizli yolla dəstək verir. O cümlədən, İŞİD-ə müxtəlif formalarda yardım edir. Əgər Türkiyə hökuməti bu addımlarını dayandırarsa, viza məsələsinə yenidən baxa bilərik", - deyə Puşkov vurğulayıb.

Deputat onu da vurğulayıb ki, Türkiyə terrorçular üçün tranzit ölkədir. O, hər an bu ölkədən Rusiyaya terrorçuların gələcəyini istisna etməyib.

Xatırladaq ki, Rusiya Xarici İşlər naziri Sergey Lavrov Türkiyəyə viza rejiminin 2016-cı il yanvarın 1-dən bərpa ediləcəyini açıqlayıb.