Hazırda Rusiya-Türkiyə arasında gərginliyin artması problemləri daha da dərinləşdirir, yəni vəziyyət get-gedə həssaslaşır.

Bu sözləri Axar.az-a açıqlamasında politoloq İlqar Vəlizadə deyib. Ekspert Rusiya tərəfinin çox emosional davrandığını bildirib:

"Moskvanın hazırkı addımları kifayət qədər hesablanmayıb. Hələlik ortada olan demarşları görürük. Ancaq vəziyyət o yerdədir ki, daha ağır nəticələr də ola bilər. Çünki ikitərəfli iqtisadi layihələr kifayət qədər böyükdür. Sanksiyalar baxımından Rusiyanın iqtisadi blokada altında olması fonunda Türkiyə ilə münasibətlərin bu səviyyəyə çatdırılması Moskvaya yaxşı heç nə vəd etmir. Türkiyə ilə iqtisadi əlaqələrdən imtina Rusiyanı çox böyük zərbə altında qoyacaq. Verilən qərarlar emosional şəkildə qəbul olunur, bu isəTürkiyə ilə qaz layihələrini zərbə altında qoyur. Digər tərəfdən Ukrayna ilə münasibətlər də olduqca gərgindir. Rusiyada yalnız "Şimal axını"dır ki, bu və ya digər şəkildə problemsiz fəaliyyət göstərir. Düzdür, bu proses Türkiyəyə də təsirsiz ötüşməyəcək. İş orasındadır ki, Türkiyə iqtisadiyyatı çevikdir və sanksiyaların təsiri altında qalmayacaq. Eyni zamanda, Ankaranın özünə başqa tərəfdaşlar tapması çətin deyil. Rusiyanın bazarları isə kifayət qədər daralıb. Bir sözlə, bu prosesdən ən çox zərərli çıxan tərəf Rusiya olacaq".

Qeyd edək ki, Türkiyə hava məkanını pozan Rusiyaya məxsus Su-24 bombardmançısının Türkiyə Silahlı Qüvvələrinə məxsus F-16 tərəfindən vurulması beynəlxalq skandala səbəb olub.