Maliyyə Bazaralarına Nəzarət Palatası çox ciddi bir orqan olduğu və önəmli yoxlamalara nəzarət edəcəyi üçün bu qurumun dövlət büdcəsindən maliyyələşdirilməsi daha məqsədəuyğun olardı.

Bu sözləri Axar.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov deyib. Deputat Maliyyə Bazarlarına Nəzarət Palatasının özünü maliyyələşdirmə prinsipi ilə bağlı açıqlama verib:

"Maliyyə Bazarlarına Nəzarət Palatası ilə bağlı ola bilsin, müəyyən qanun və ya əsasnamə qəbul ediləcək ki, əldə olunan gəlirlərin müəyyən hissəsi qurumun xərcləri üçün istifadə edilsin. Publik şəxs statusunda yaradılacaq yeni palatanın özünü maliyyələşdirməsinin başqa yolunu görmürəm. Təcrübəyə əsasən, bir sıra nazirliklərdə yığılan vergi yığımlarının hardasa 25 faizə yaxını maaşların verilməsi üçün istifadə edilir. Hesab edirəm ki, Maliyyə Bazarlarına Nəzarət Palatası çox ciddi bir orqan olduğu və önəmli yoxlamalara nəzarət edəcəyi üçün bu qurumun dövlət büdcəsindən maliyyələşdirilməsi daha məqsədəuyğun olardı".

Qeyd edək ki, Prezident İlham Əliyev fevralın 3-də Azərbaycan Respublikasının Maliyyə Bazarlarına Nəzarət Palatası publik hüquqi şəxsin yaradılması haqqında fərman imzalayıb.