Ana səhifə Yazarlar |
Elnarə Tofiqqızını xatırlarkən...
...Qəfil xəbər tərs sillə kimi tutdu məni, hələ də zərbə
dəyən tərəfimin ruhunu hiss etmirəm. Əvvəl gözlərimə inanmadım,
sonra ağlıma sığışdırmadım. Bəlkə yüz dəfə oxudum, şəkillərə
baxdım, ağladım, ağladım... Əfsus, elə göz yaşlarım kimi heç nəyi
dəyişməyə qadir olmayan acizliyim yandırıb tökdü məni. Başladı
yaddaşım geri saymağa…
Tanışlıq
Onunla ilk dəfə BSU-nun pilləkənlərində qarşılaşmışdıq. İlk dəfə
gördüyüm xanım saf gözləri, qədd-qaməti və xoş təbəssümü ilə
diqqətimi çəkdi. Elə həmin gün konfrans zalının qarşısında təkrar
qarşılaşdıq.
Mən: – Bir gündə 2 təsadüf olmaz, - dedim.
O, gülə-gülə: – Deməli təsadüf deyil!" – cavabını verdi.
Nə yaxşı ki, bu bir təsadüf olmadı və bir ömür unutmayacağım bir
insanı tanımaq, sevmək, güvənmək imkanım oldu.
Elnarə xanıma "böyük bacım" deyərdim. Yaşıd olsaq da.. Arada gülüb
deyirdi, yaxşı ki, xanbacı demirsən…Bakı Slavyan Universitetindəki
otağı dərs başlayana qədər istirahət, dərs bitdikdən sonra Elnarə
xanımla məsləhət otağım olurdu. Çay iç deyərdi.. və həmişə səbəbi
vardı. Uzaq yoldan gəlmisən, uzaq yola gedəcəksən.
Ortaq məxrəclərimiz çox idi - uşaqlar, güllər, bijuteriyalar.
Ən çox uşaq psixologiyasi haqqında danışardıq… hər ikimiz üçün
maraqlı idi, Bir gün uşaqlarımızı görüşdürmək, fərqli mühit və
dünyagörüşlərdə tərbiyə alan, böyüyən uşaqların düşüncə tərzlərini
müqayisə etmək planımızda var idi.
Gülləri çox sevərdi. Otağı gül təravətinə bürünərdi. Güllərdən
həvəslə danışardıq.
Dibçəkdə bir yarpaq solanda dərd edərdi. Bir dəfə yeni açmış dibçək
gülün göstərdi ki, gör nə qəşəngdi. Hec unutmayacağım bir məsləhət
verdi: Güllər zərifdi, yaxından qoxulama, əzilər. Güllərə belə
qıymırdı.
İri qaşlı bijuteriyaları sevərdi, xüsusilə qırmızı rəngli. Mənsə
qırmızı rəngi sevməzdim. Mənə irad tutardı, qırmızını müdafiə
edərdi, "ürəyimiz də qırmızıdı axı", deyərdi.
Dəyərləndirməyi sevərdi.. Gözəl gördüyü hər şeyi qiymətləndirər,
könlümüzü xoş edərdi, əslində hər şeyi gözəl görərdi.
Paylaşmağı sevərdi… Kitablarını, kosmetikasını ürəklə təklif
edərdi.
Ailədə Anka deyildiyini bilirdim. Özündən soruşmağa zaman imkan
vermədi, qardaşından soruşdum ki, niyə Anka?
"Ata nənəm "Uzaq sahillərdə" filminə baxandan sonra deyib ki,
oğlumun qızı olsa, adını Anjelika qoyacam. Onda atam hələ subay
imiş. Sonra atam evlənib, qızı olub, bu adı yazdırmağa gedəndə VVAQ
şöbəsində deyiblər ki, bu ad müsəlman adı deyil. Onda anam deyib
ki, ailədə Anka deyərik. O vaxtdan bütün ailə ona Anka deyirdi, o
bizim başımızın tacı Ankamız idi".
"Anka" bəzi mənbələrdə simurq quşu, zümrüd quşu, bəzi mənbələrdə
dövlət quşu mənasındadır. Elnarə xanım özü boyda dövlət idi -
zəngin, güclü…
Xatirələrim də bax beləcə, düşündüklərim kimi, qırıq kəsik,
qarmaqarışıqdı.
Acılarımın çox az hissəsini ifadə edə bilirəm. Sözsüz ağrıdı bu.
Cəsarətsizəm… İki körpənin məsum gözlərinə baxa bilməyəcək, ana
laylasına həsrət balarını ata laylası ilə ovutmağa məhkum ataya "
Allah səbir versin" deyə bilməyəcək qədər cəsarətsiz...
Tarix
2016.05.21 / 11:54
|
Müəllif
Aynur Cavid
|